[Crónica] Pendones: de Aljubarrota al Ipiranga

Por Alcides Meirinhos (Associação de Língua e Cultura Mirandesa - ALCM)

Pendones!!! Mas que seinhas son essas? perguntaran  dalguns. Outros, míran de lhado quando ouserban aqueilhas bandeiras na crona de altas baras, an porciçon chubindo San Juan de las Arribas adreitos a Aldeinuoba. Podemos nun saber l que son nien l que repersentan, mas ye seinha que mos deixa cumo que … ancantados cun tamanho fincon. Tanto assi ye que chegamos a quedar cun pel de pita.

Nun ténen letras, nun ténen santos, dalguns son todos burmeilhos, outros a las riscas acamadas, cuntrapiadas antre l burmeilho, l berde, l amarielho ou l azul, mas todos eilhes cunserban l burmeilho carmezin de l antigo Reino de Lhion. Son “bandeiras”, cumo dalguns las cháman, essas telas que cúntan cuontas. Mas cumo hoije l filo de las cuontas nun dzambaranha, gustarie de bos poner dalguas preguntas, cumo por eisemplo:

- Porque ye que la bandeira de l Brasil assenta nua tela berde?

Ls Pendones, diçque, bénen de ls tiempos de la recunquista crestiana zde l anho 722 (diç que ye la batalha de Covadonga) até 1492 cula recunquista de l Reino de Granada. Essas cuontas yá bós las sabeis, cumo sabeis que ls Pendones éran las seinhas para que, durante las batalhas, cada soldado ou cabalheiro soubira an que lhado batalhar porque las farpelas haberien de ser mui armanas dambos lhados. Portanto, ls Pendones eidenteficában eizércitos, fússen eilhes de nobres, de condes ou de reis, ou seia, éran, cumo hoije son, seinha de pertenéncia.

Mas tornando atrás, a la bandeira de l Brasil, diç-mos l porsor Nuno Severiano Teixeira ne l sou lhibro “Heróis do Mar”, que, an 1385, na batalha de Aljubarrota, le Pendon de D. Nuno Álvares Pereira, na ala de ls einamorados, era berde. Ora, la filha de l Cundestable, D. Beatriç, casa-se más tarde cun D. Fonso, zorro de D. Juan I i ye este D. Fonso I que toma l títalo de purmeiro Duque de Bergáncia. Cunta-se que l berde siempre acumpanha esta Casa, casa que an 1640 ampeça la Dinastia de Bergáncia cun D. Juan IV. Desta maneira, podemos ber que l Brason desta Dinastia ten an dambos lhados un dragon berde, portanto, somos lhebados a pensar que l berde de Aljubarrota sigue nas armas de l rei.

Mas quando ls franceses de Napoleon quieren cunquistar Pertual an 1807, l rei i toda la corte, foutos cumo naide, ála pal Brasil, que nessa data era ua quelónia pertuesa. Solo que an 1822, D. Pedro (de la dinastia de Bergáncia) fai de l Brasil un paíç i todo l paíç ten ua bandeira “… será composto das cores emblemáticas — verde de primavera e amarelo d'ouro.”

Anton, tornamos a la pregunta: la bandeira de l Brasil ten que ber cula primabera ou cul berde de la Casa de Bergáncia i, por associaçon de eideias, cul Pendon de l Cundestable an Aljubarrota?

Ua cousa ye cierta: toda la antiga Tierra de Miranda, que an tiempos fizo parte de l Reino de Lhion ten un Pendon cumo seinha maior de pertenéncia, chame-se essa tierra Freixenosa, Infainç, Algoso, Cérceno ou Pinelo.

Perdé-los ou deixá-los scundidos i ambergonhados nas arcas de las sacrestias ye perder un pouco la nuossa eidentidade.

I un die destes, quando calhar i benir a modos, cunto-bos la cuonta de l Pendon de Infainç, ou cumo un pobo guardou un panho roto, de tiras romendadas i a las quelores, que naide sabie para que serbie, mas mesmo assi eilhi quedou cumo teçtemunha de ancianos rituales.